Folgefonnhalvøya er eit område med store naturverdiar. Vakre landskap og rik vassdragsnatur har mellom anna ført til at fem vassdrag vart verna mot kraftutbygging på 80- og 90-talet. Området var og tidleg med i arbeidet med ny nasjonalparkplan, mellom anna ut frå verneverdiar knytt til botanikk og geologi.

Nasjonalparken vart oppretta i april 2005. H M Dronning Sonja stod for den offisielle opninga den 14. mai 2005.

Fylkesmannen i Hordaland har utarbeidd verneplanen for Folgefonna. Planarbeidet starta formelt i 1998 og omfatta forslag om ny nasjonalpark og fleire landskapsvernområde på Folgefonnhalvøya. Formålet er å sikre viktige natur- og kulturmiljø i området, frå låglandet til dalføra og høgareliggjande område med fjell og bre. På miljøstatus i Hordaland sin nettstad finn du mykje informasjon om verneplanprosessen.

På Direktoratet for naturforvaltning sine heimesider finn du ein flott presentasjon av Folgefonna nasjonalpark.

I Folgefonna Informasjonssenter kan du sjå utstillinga om Folgefonna nasjonalpark og fleire filmar og biletspel om bruk og vern av Folgefonna!